Samedi 7 novembre 2009
6
07
/11
/Nov
/2009
14:15
Xiberoaren nortasuna eta inguramena indartzea xede duen energia berriztagarrien eta eko-eraikuntzari buruzko saloia zabalik Maulen
Azaroaren 6, 7 eta 8an energia berriztagarrien eta eko-eraikuntzari buruzko laugarren saloia iraganen da Maulen, Herri Elkargoak antolaturik. Lurralde garapenari
buruzko hausnarketa eraman ondoan sortu da saloia honen antolatzearen ideia eta Xiberoaren proiektuaren norabidea adierazten duen hitzordu izanen da. Hala, Xiberoaren nortasuna eta inguramena
atxikitzeko eta indartzeko helburuz, garapen iraunkorraren parioa egitearen xedea plazaratuko dute antolatzaileek.
Gaxuxa ARRANBIDE
Lurralde proiektua arraberritzeko beharra aipatu zenean, hautetsi, ofiziale eta elkarteen artean biltzen hasi zinen Xiberoaren garapen ekonomikoari buruzko
gogoeta eramateko. Hortik, Maulen eko saloia baten antolatzea deliberatu zen.
«Lurralde proiektua arraberritzeko lanetan, laborantxa, industria eta turismoaren aldea baino zabalago begiratu behar genuela ohartu ginen, gure nortasuna eta
inguramena atxiki eta indartzeko xedea gauzatu ahal izateko » azaltzen du Jean Pierre Iriart Aloze Ziboze Onizegaineko hautetsiak.
Hortik jadanik aitzinatuak edo sendotuak diren sailez gain, beste sail bat sortzea erabaki zuten, hau da garapen « berde bat » lantzea erabaki zen. Nafarroako
politika publikoa begiratuz, energia berriztagarrien erabilpenaren interesaz ohartu zirela kondatu du.
«Egurra, haizearen edota ekiaren indarraren balioaz ohartu ginen eta baita ere energia berriztagarrien sailak sortu zituen lanpostuetaz. Aktibitate honek gure
xedearekin lehial egonez, lurraldearen garapen ekonomikoari mesede eginen ziola ohartu ginen».
Lurralde proiektua
«Garapen iraunkorra sustatuz, eremu guzietara hedatuko den saila da energi berriztagarrien erabilpena. Berezitasun honen garapenari biziki atxikiak gira Euskal
Herria eta berezikiago Xiberoaren nortasuna zaintzeko balio duelako, inguramena bezain beste» dio hautetsiak.
Gisa hartan, garapen iraunkorra garapen ekonomikoarekin loturik dela azaltzen du.« Publiko zabalari garapen iraunkorraren garrantzia eta garapen
ekonomikoarentzat duen balioaren konzientzia piztea espero dugu» gaineratzen du.
Xiberoan oihan handiak badira eta egurraren saila garatu nahi luke Xiberoko Herri Elkargoak. «Horretarako galde eta eskaintzaren artean oreka beharrezko da. Gaur
egun maleruski, galdea tipiegia da sail honen eramateko, beraz espero dugu konzientzia piztearekin galdea eta eskaintza, biak partituko direla » azaltzen du Iriartek.
Bideratzeko oztopoen gainetik
Herri Elkargoaren xedea gauzatzeko oztopoak daudela aitortzen du Iriartek. Ditugun kolegioak Kontseilu Orokorraren konpetentzian dauda, lizeoak Akitaniako
departamenduaren esku delarik. Konpetentziak banatuak izateak aferak luzatzen ditu » zehazten du.
« Hauen menpe dago afera eta ez dugu gauza handirik egiten ahal, pazientziarekin itxoitea izan ezik. Ez da ados ez direla, baizik eta luze dela gauzak plantatzea
» gaineratzen du. Bestalde, Herri Elkargoak 2020 egitasmoari proiektuaren berri eman duela eta hortik zerbait aterako denaren esperantza dutela gaineratu du.
Saloia parte hartzailea
Lurralde proiektuaren aurkezpena egiteko antolatzen hasi dira eko saloia eta mintzaldi interesgarri andana antolatu dituzte publiko zabalari idekia Herri
Elkargoak hartzen duen norabidea azaltzeko.
« Hitzordu guziak kitorik eskaintzen ditugu guretzat inportanteena inguramena zaintzearen beharraren konzientzia piztea baita » dio Iriartek. Hautetsi, elkarte,
aktore ekonomiko eta herritarrek hausnarketa eraman eta ekarpenak plazaratzeko hitzordua izanen dela espero du manera honetan.
Asteburuko hitzorduak, izan barnekaldekoa edo kostaldekoa, euskal herritar ororen interesa piztuko duela espero du Iriartek, zeren eta Euskal Herriaren nortasuna
eta inguramenaren berezitasuna atxikitzeko proposamena aurkeztuko du.
Kazeta.info
